COMPRENSIÓN LECTORA LINGUA 3º - 4º 27/04/2020

Ola chicos,que tal? Espero que ben. Imaxino que onte sairíades da casa, e pouco a pouco podades volver á normalidade.
Hoxe déixovos unha comprensión lectora e uns refráns para copiar na libreta de lingua; se podedes, aprendede algún.

1º Facemos unha primeira lectura silenciosa.
2º Leremos de novo o texto en voz alta, cunha boa entoación e respectando os puntos e as comas .
3º No caderno poñenos Máis Xogos e Menos Xoguetes.
4º Facemos os exercicios.
5º Copiamos os refráns.

NON ESQUEZADES POÑER A DATA

TERCEIRO - CUARTO

MÁIS XOGOS E MENOS XOGUETES

Segundo unha recente enquisa internacional, os nenos son grandes consumidores. Elixen produtos e marcas tanto en alimentación como en roupa ou en xoguetes. En tempo de crise económica, parécenos oportuno reflexionar sobre este consumismo.

Os nosos fillos teñen moitos, moitos xoguetes. Seguramente demasiados. Cada ano, os Reis, Papá Noel e a xenerosidade de toda a familia fan que se nos acumulen trastes, caixas, bonecos, construcións… Logo están os caprichiños: os nenos obteñen un xoguete novo case cada semana: nas tendas de todo a un euro, nas promocións dos restaurantes, etc. Eles acumulan e acumulan. Sorpréndense ante a novidade, pero ao pouco tempo quedan aburridos dela e xa están desexando outra cousa máis. Parece que se volveron insaciables. É unha consecuencia da publicidade.

Pero, en realidade, eles botan de menos xogar en familia. Prefiren xogar cunha persoa antes que facelo sós cun xoguete marabilloso. Os nenos, ás veces, están moi sós entre tantos xoguetes. Algúns son capaces de xogar sós durante horas, tecendo aventuras coa súa imaxinación. Pero a maioría necesita unha persoa, un verdadeiro «xoguete interactivo»: seu pai, súa avóa, súa tata, seu irmanciño maior… E diso non se aburren.

 1º Segundo o texto, como obteñen os rapaces a maioría dos xoguetes? Subliñamos as respostas correctas: 

a) Comprándoos cos seus aforros. 

b) Son regalos da familia. 

c) Recíbenos como premio dos profesores polas súas boas notas. 

d) Regálanllos nas festas de Nadal. 

e) Conséguenos en forma de caprichiño semanal.

2º Quen provoca que axiña se aburran do que teñen e queiran algo máis? Marcamos cun X a resposta correcta: 

❏ o egoísmo ❏ a necesidade ❏ a publicidade ❏ os pais

3º Relacionamos as seguintes palabras coa súa definición: 

crise - insaciable - enquisa - traste - interactivo - consumismo

a)  Conxunto de preguntas que se fan sobre un tema_________
b)  Gasto excesivo para adquirir cousas___________
c)  Que permite a relación entre dúas ou máis persoas_______
d)  Situación económica de escaseza____________
e)  Calquera obxecto vello ou que xa resulta inútil__________
f)  Que non se farta nunca__________

4º Subliñamos no texto seis substantivos comúns. Logo escribimos os nomes na libreta e poñémoslle un adxectivo que lle caia ben.

Lembramos: Os adxectivos son as palabras que nos din como están ou como son as persoas, os animais, as cousas e as ideas.

Exemplo: Brillante    idea

               adxectivo  substantivo

5º Escribimos un pequeno resumo do texto. 

Lembramos que non se trata de copiar oracións do texto, senón pensar na idea ou ideas máis importantes e escribilas coas nosas palabras.

REFRÁNS

EN ABRIL, NIN CON SOL NIN CON CANDIL

ENTRE LUSCO E FUSCO NON ATOPO O QUE BUSCO

OUTONO A CHEGAR, PORCO A CEBAR